玳寧顏色
(2009/11/16 蘋果日報)
潮流興環保，興保育，似乎唔講就係保守、頑固、過氣人物。唔係唔講嘅，不過不要走火入魔，以為自己就係真理。左丁山試過一輪聽醫生所言，日日食兩個奇異果。醫生話奇異果有豐富維他命Ｃ，每日食兩個，有益健康。
於是叫公司助理去買，仲為咗環保理由，要佢買有機奇異果。置地廣場約克大廈有間360，有機蔬果大量供應，食一個月，助理話：「左生，360嘅奇異果價錢貴百佳惠康嘅奇異果一倍，你使唔使咁嘥錢呀？」
左丁山不虞有此一問，思索良久，因為助理又話：「我巳哋低級打工仔食唔起有機蔬果！」
食奇異果，有一個小膠耙，係梁玳寧送嘅，用小膠耙刮果肉，極之方便，睹物思人，不禁嘆一口氣。玳寧嘅告別儀式已定於十一月二十日星期五晚上六時設靈，次日星期六下午二時半辭靈，地方就沙田大圍寶福紀念館寶福大禮堂（大圍火車站G出口，有穿梭巴士）。
玳寧生前意願係敬辭帛金，各方友好如欲送帛金，請轉為捐畀「智行基金會」，此基金會在一九九八年成立，旨在向內地愛滋病人的子女及孤兒提供教育及生活經費幫助，目前「智行」服務遍佈河南、安徽等七個省份之內二百幾個「愛滋村」，受惠孤兒逾八千餘名，想知多啲，可瀏覽www.chfaidsorphans.com，左丁山已經寄咗支票去。
玳寧愛心甚重，近年佢大力協助「智行」，就係有見於中國之愛滋孤兒，備受歧視，心有所不忍。如果各界友好要送花嘅話，玳寧靈堂布置會係粉紫色，女士到場致祭，請穿粉紫、粉綠、紫藍，此皆玳寧生前所喜。
講番保育，左丁山不知道中環街市有何保育價值，亦唔睇好市建局有本事活化中環街市，上環西港城外形仲靚啦，多年來有甚麼「活化成績」吖？
反而有一樣值得保留嘅，就係報紙檔，外國城市好少有報紙檔，亞洲城市亦少見，只有我哋香港在繁盛街道有咁多報紙檔，成為香港特色，此外，如果報紙檔不能以正當方法生存，要靠違法擴充地盤阻礙行人嚟生存嘅話，對報販營生好唔公道。報販消失嘅話，香港報紙嘅損失最大，報紙與報販唇齒相依，不可不知，近日全港報販大聯盟主席廖社青表示有報販收入下降及逼住違法賣私煙，為何如此，值得報紙記者追蹤報道啫！
