玳宁颜色
(2009/11/16 苹果日报)
潮流兴环保，兴保育，似乎唔讲就系保守丶顽固丶过气人物。唔系唔讲嘅，不过不要走火入魔，以为自己就系真理。左丁山试过一轮听医生所言，日日食两个奇异果。医生话奇异果有丰富维他命Ｃ，每日食两个，有益健康。
於是叫公司助理去买，仲为咗环保理由，要佢买有机奇异果。置地广场约克大厦有间360，有机蔬果大量供应，食一个月，助理话：「左生，360嘅奇异果价钱贵百佳惠康嘅奇异果一倍，你使唔使咁嘥钱呀？」
左丁山不虞有此一问，思索良久，因为助理又话：「我巳哋低级打工仔食唔起有机蔬果！」
食奇异果，有一个小胶耙，系梁玳宁送嘅，用小胶耙刮果肉，极之方便，睹物思人，不禁叹一口气。玳宁嘅告别仪式已定於十一月二十日星期五晚上六时设灵，次日星期六下午二时半辞灵，地方就沙田大围宝福纪念馆宝福大礼堂（大围火车站G出口，有穿梭巴士）。
玳宁生前意愿系敬辞帛金，各方友好如欲送帛金，请转为捐畀「智行基金会」，此基金会在一九九八年成立，旨在向内地爱滋病人的子女及孤儿提供教育及生活经费帮助，目前「智行」服务遍布河南丶安徽等七个省份之内二百几个「爱滋村」，受惠孤儿逾八千馀名，想知多啲，可浏览www.chfaidsorphans.com，左丁山已经寄咗支票去。
玳宁爱心甚重，近年佢大力协助「智行」，就系有见於中国之爱滋孤儿，备受歧视，心有所不忍。如果各界友好要送花嘅话，玳宁灵堂布置会系粉紫色，女士到场致祭，请穿粉紫丶粉绿丶紫蓝，此皆玳宁生前所喜。
讲番保育，左丁山不知道中环街市有何保育价值，亦唔睇好市建局有本事活化中环街市，上环西港城外形仲靓啦，多年来有甚麽「活化成绩」吖？
反而有一样值得保留嘅，就系报纸档，外国城市好少有报纸档，亚洲城市亦少见，只有我哋香港在繁盛街道有咁多报纸档，成为香港特色，此外，如果报纸档不能以正当方法生存，要靠违法扩充地盘阻碍行人嚟生存嘅话，对报贩营生好唔公道。报贩消失嘅话，香港报纸嘅损失最大，报纸与报贩唇齿相依，不可不知，近日全港报贩大联盟主席廖社青表示有报贩收入下降及逼住违法卖私烟，为何如此，值得报纸记者追踪报道啫！
