政情：李家誠撐徐子淇打救愛滋病遺孤
(2008/05/04 東方日報)
富豪二代近期密密做善事，恒基副主席李家傑可稱得上係佼佼者，佢率領百仁基金行善成績有目共睹，有次佢細佬 家誠同 太太徐子淇仲齊齊出動為百仁基金出力，同天水圍小朋友齊享盆菜宴，其實家誠仲暗中水力撐太太徐子淇做善事。
子淇係專為救助內地愛滋病遺孤「智行基金」成員，佢計劃下月十四日父親節前夕，為基金舉辦一個籌款午宴，順道同父親慶祝。
子淇尋日開始廣發英雄帖，邀請各方善長仁翁參加呢個午宴，午宴命名為「Miramar3300 」，Miramar 係代表美麗華酒店舉行，3300 即係每個三人家庭入場費要三千三百元，佢話呢個費用已經可為一個愛滋病遺孤兒童提供九年教育。
今次午宴另一意義，係子淇希望幫助一失去父親不幸兒童，所以子淇信中叫參加善長帶埋父親一齊參加開心！
表演豎琴娛賓
至於籌款午宴點解美麗華酒店宴會廳搞，相信大家都估到，美麗華係李兆基家族旗下酒店，而子淇老公家誠又係美麗華酒店執行董事，所以美麗華會贊助今次午宴約四百名賓客膳食費用，預計費用為二十萬至三十萬元。
美麗華初步安排四道特色西菜招呼賓客，仲會安排表演節目。據聞當日子淇會偕家誠同女兒Leanna 一家三口齊出席，子淇仲會上台表演豎琴娛賓添！
其實澳門賭王何鴻燊之子、新濠集團老闆何猷龍都好支持「智行基金」，尋晚佢就借出旗下香港仔「珍寶王國」畀基金搞個「愛．活力」籌款之夜，筵開五十席，子淇同家誠兩公婆都有到場支持，點解佢咁支持基金呢？除子淇係基金成員外，原來家誠亦係基金創辦人杜聰老友，識家誠呢老友真係唔話得！
卓妮
This post is also available in: Chinese (Traditional) Chinese (Simplified)
